UNGAH GRAND PRIX

Bahagian 5

Penyampaian hadiah diteruskan jua subuh atu pasalnya ada yang kan mulih lapas atu. Penyampai hadiah untuk kategori malam atu lah siang lain lagi tu, iaitu kategori Perseorangan Ungah Paling Basar, Lauk Ganjil dan Ungah Paling Damit. Kategori kumpulan Paling Banyak Belurih. Hadaiah disampaikan oleh Pengerusi dan Team Jemputan.

Jef jurugambar Ungah Grand Prix kami ani mendapat hadiah untuk Ungah Paling Damit, walaupun damit nyaman jua hati tu dapat hadiah bah. Hadiahnya atu disumbangkan oleh Hj Win Sdn Bhd tu, pemata steel sama kili2 lupa ku apa jenamanya.

Mohet ani ia mendapat Lauk Ganjil antah apa kah nama lauknya. Hadiahnya disumbangkan Oleh Popperazi dan ia sendiri jua yang memilih pemenangnya atu. Bungkusannya Liverpool plang tu tapi isinya barang2 kail tu eh popperazi ganya yang tau ni ia membungkus sendiri. Nanti tah betanya ah c Mohet ani apa kah isinya bungkusan Liverpool ani.

C Awi ani wakil saja ni, C Boy manang kategori lauk pertama iaitu ungah, ia awal balik malam atu iatah wakilnya tah ganya inda apa tu Boy, tahniah ah

Joseph menang Kategori Ungah Paling Besar iaitu 1.6kg, hadiah sumbangan Deep Blue Fishing spool sama joran, pun inda ku ingat apa jenamanya. Eh Mun inda 3 kategori ni c Joseph manang, Ungah Paling Basar, Lauk Ganjil ia jua Lauk Pertama. Tapi inda dikira, ada kan ku terangkan dalam post yang Bahagian 4 kali ah.

Tahniah diucapkan kepada yang menjuarai kategori-kategori yang dipertandingkan, yang lain atu teruskan usaha jangan kecewa atu udah rezeki masing-masing tu ok. Terima kasih diucapkan kepada penyumbang-penyumbang hadiah terutama sekali DeepBlue Fishing, inda lupa jua Hj Win, Duwan dan Fee Yant.