I made this widget at MyFlashFetish.com.

Search This Blog

ASSALAMUALAIKUM DAN SALAM SEJAHTERA. BLOGSPOT ANI DIBUAT UNTUK MENYIMPAN KENANGAN MANIS DAN PAIT MELALUI GAMBAR DAN TULISAN, UNTUK BERKONGSI PENGALAMAN, PENGETAHUAN, PEGAJARAN, TEMPAT DAN KESIUKKAN MENGAIL. IANYA JUA UNTUK MENGENALI DAN MENGENALKAN NAMA DAN JENIS LAUK DI AING MASIN DAN AING TAWAR YANG ADA DI LAUT, DI TEPI PANTAI, DI SUNGAI MAUPUN DI TASIK YANG TERDAPAT DI NEGARA BRUNEI DARUSSALAM ANI MELALUI GENG PENGAILAN SEMUA. KAMI UCAPKAN TERIMA KASIH KEPADA YANG BERKESUDIAN MENGUNJUNGI BLOGSPOT ANI.

Kepada geng pengailan semua mun kan berkongsi gambar, cerita, tulisan, pengajaran, pengalaman, trip mengail, alat-alat mengail, alat-alat penangkapan yang lain atau apa saja lah samada petua, pantang larang atau etika mengenai mengail boleh lah mengirimkan ke

Pa_damit@hotmail.com

Preciousanglers@gmail.com

8193404 (bmobile)
8773404 (dst)


I made this widget at MyFlashFetish.com.

Kapal karam Maharaja

Tuesday, 31 August 2010

Gambar-gambar ani disumbangkan oleh Popperazi. 26 Ogos malam jumat ari atu bisdia turun sama Pg. Zul, CoachDean (Pudin), Popperazi pun ikut jua. Iatah ni lauk-lauknya yang bisdia belurih ah, baru puas hati nah. Sangal jua tangan pakah eh nada banyak berehat usulnya.
kepayang-kepayang
jukot

lapih

anduping lausu

languran

ungah batu
(guntur)

sulit

santak

ambong-ambong

pari


Popping sama Jigging lagi

Saturday, 28 August 2010











Popping sama Jigging

Wednesday, 25 August 2010

Hari selasa malam rabu kami turun kan popping sama jigging, nda plang ada rancangan atu yang banarnya. Sudah selesai sungkai kira-kira pukul 7 malam ada tah Capt. Precious Awie ani menelefon, "turun tani karang batah udah inda popping ani, cuaca pun bisai taduh jua usulnya". Baru tah menelefon lagi yang lain siapa yang belaku kan dibawa turun disaat-sat akhir ani. Akhirnya 5 orang tah kami, Capt. Precious, PAdamit, G-Mi, Popperazi sama Hj Win. Di rumah bekumpul kira-kira pukul 8.30 kami jalan, selesai membali minyak sama minuman dalam pukul 9 kami tolak dari Jerudong. Pukul 10 kami sampai, "bah dalam 2 jam tani popping sama jigging sampat jua lagi sahur di rumah". Baru tah kan memasang-masang, aku sedia udah ni kan beraksi.
PAdamit
luih popping
makai Twin Power
GT 3.5kg
Languran yang basar atu 3kg luih ku popping makai Fream Kix 4000, yang lain atu luih kami jigging.

2 ekong yang basar atu Capt. Precious sama Popperazi belurih popping dalam 6kg lah beratnya. Yang lain atu Hj Win 2 ekong popperazi sekong luih jigging, aku sekong luih popping.




Popperazi
luih popping sama jigging

Iatah ni luih kami malam atu GT 6 ekong sama languran 9 ekong.




Popperazi sibuk-sibuk menimbang pakai timbangan digitalnya ah.


Aku menyusun-nyusun lauk untuk kan digambar, popperazi menimbang-nimbang inda lagi menyusun semula tu.


Bemasa (GT)

Tuesday, 17 August 2010

Ni nah nyangku yang 18kg ah, baik jua begambar lagi di rumah mun inda nada tah kan kanang-kanangan tu. Macam gambar ku GT yang 7.3kg sama 9kg nada lagi kan diliat bah.



Azman (languran)
Bemasa (GT) 18kg rekod peribadi
Rod : Hots Gipang 7XXH
Reel : Stella 20000PG
Line : PE6 Varivas

Laroi

Malam minggu atu Capt. Precious sama Pa-iring turun jua makai perahu 19kaki mengail dasar arah kapal karam di Iron Duke ah. Macam-macam jua lauknya berah-berahan, ungah, laroi, yu pasir, anduping, ada lagi yang putus tu. Mula-mula kan merawai inda jadi payah mun ganya 2 orang atu, mengail tah ganya sampai jua ke subuh.



Berah-berahan

Berah-berahan ani Capt. Precious belurih dalam sekilo labih lah.



Ungah

Ungah ani Pa-iring belurih arah kapal karam di Iron Duke, dalam 2kg beratnya.



Popping sama Jigging

Monday, 16 August 2010

Malam minggu kami turun kan popping sama jigging. PAdamit, G-Mi, Hj Win sama Languran (Azman). Dalam pukul 5 ptg udah kami di Jerudong, masalahnya kehababisan ais sana sini mengunjar akhirnya tepaksa tah membali ice-cube. Udah hampir kan baduk atu beranti kami dulu, labui-labui sambil menunggu atu menganjun kami jua, iatah basar2 temanungnya temajai kah orang menggalar tu. Lapas 10 minit sungkai berehat lagi baru tah kami popping samapi tah kesubuh. Hujannya ani sekajap-sekajap, beranging pun inda jua luan kuat lah. Dalam pukul 2 pagi rehat lagi sambil sahur, lapas atu sambung lagi sampai inda lagi ada makannya mulih tah kami. Sampai ke tambing sampat jua lagi besigup.

Syukur Alhamdulillah ada jua rezeki lah. Bemasa 4 ekong 18kg, 9kg, 7.3kg sama 6kg, Languran 11 ekong yang 2kg ke bawah lah. Ganya gambar bemasa 1 ganya yang ada, yang oleh ku menggambar atu inda dapat dibuka rosak tia selajur sama kamera Olympus 12mp ku ah. Iatah ku sasak ni olehnya. Baik jua Languran (Azman) begambar lagi di rumahnya ada jua kan di liat. Yang aku belurih 9 sama 7.3kg atu inda tah ada tu. Terserah kamu lah pecaya kah inda tu ah.a

Main Bola

Thursday, 5 August 2010

Pertama kali Precious Anglers menjadi satu pasukan bola. Masa atu Precious Anglers menentang pasukan Guru-guru Ugama di Padang Manglait Gadong. Batah plang udah ni hasrat Precious Anglers kan bemain bola ani. Hanya sehari sebelum kan bemain atu, kami memaklumkan kepada Ahli-ahli Precious Anglers Alhamdulillah ramai yang sanggup untuk bemain bola atu, walaupun batah udah inda bemain, ada yang udah pencen bah demi untuk Precious Anglers sanggupi saja tia bukan jua selalu. Dalam padang bola pun, perbualannya lakat jua mengenai MENGAIL. Padang atu bealun lah, ada tia drop off, makai kasut Daiwa lah, ada yang menarik sauh, Stella saja yang tahan yang lain pancit udah, ada yang mauk jua batah udah inda main bola atu baik jua inda menabur ja nya. Macam-macam lagi lah yang dikaitkan pasal mengail ani. Dalam perlawanan atu kami kalah 3-4, tapi inda mengapa kami menunjukkan semangat berpasukan yang membanggakan. Ani adalah permulaan, mungkin main bola ani jua nanti kami jadikan aktiviti Precious Anglers kalau di musim tangkujuh.
Diantara Precious Anglers yang belaku datang dan main,
bediri dari kiri
Chester, Popperazi, PAdamit, Capt. Precious Awie, Dom, Boy, Awi,
Halim, Fee Yant.

Duduk dari kiri
Dini, Raman, G-Sham, Jeruju Pandan (jef), Pa-iring, Hadi (Pa-iring Jr),
G-Mi, Hj Win.
Terima kasih diucapkan kepada semua Precious Anglers kerana sanggup datang dan bemain bola bersama-sama, bukan saja mengail tapi bemain bola pun tani boleh.
Brunei Yakin.

Languran

Monday, 2 August 2010

Languran ani lurih ku menjigging ah kapal karam di Maharaja ah. Malam minggu kami 4 separadian Pa-iring, Capt. Precious Awie, PAdamit sama G-Mi. Yang banarnya kami kan merawai plang tu, udah perahu di aing baru tah ingat batu untuk pembarati rawai ani ketinggalan di rumah. Kami cuba jua mengunjar batu di tambing2 pantai Jerudong ah, nada yang bedamitan bah. Aing taduh plang nada bealun, udah ahir baru tah berangin sedikit ujan pun inda jua labat lah. Iatah ganya ni lurih kami sekong languran ah.
Anak ku Farahiyah 4 tahun ku suruh menggambar dalam bilik mandi.
Languran 3.2 kg
teknik jigging
spool twin power 8000PG
rod jig wrex
braided power pro 50Ibs