I made this widget at MyFlashFetish.com.

Search This Blog

ASSALAMUALAIKUM DAN SALAM SEJAHTERA. BLOGSPOT ANI DIBUAT UNTUK MENYIMPAN KENANGAN MANIS DAN PAIT MELALUI GAMBAR DAN TULISAN, UNTUK BERKONGSI PENGALAMAN, PENGETAHUAN, PEGAJARAN, TEMPAT DAN KESIUKKAN MENGAIL. IANYA JUA UNTUK MENGENALI DAN MENGENALKAN NAMA DAN JENIS LAUK DI AING MASIN DAN AING TAWAR YANG ADA DI LAUT, DI TEPI PANTAI, DI SUNGAI MAUPUN DI TASIK YANG TERDAPAT DI NEGARA BRUNEI DARUSSALAM ANI MELALUI GENG PENGAILAN SEMUA. KAMI UCAPKAN TERIMA KASIH KEPADA YANG BERKESUDIAN MENGUNJUNGI BLOGSPOT ANI.

Kepada geng pengailan semua mun kan berkongsi gambar, cerita, tulisan, pengajaran, pengalaman, trip mengail, alat-alat mengail, alat-alat penangkapan yang lain atau apa saja lah samada petua, pantang larang atau etika mengenai mengail boleh lah mengirimkan ke

Pa_damit@hotmail.com

Preciousanglers@gmail.com

8193404 (bmobile)
8773404 (dst)


I made this widget at MyFlashFetish.com.

Tangkap dan lepas

Monday, 28 June 2010

video

Amber Jack (aji-aji)

Hj Win sama G-Mi turun membawa orang mencatar perahu bisdurang Ameng, Azman sama Latif ke drop off, durang ani request kan menjiging saja nda bebata umpan. Dalam perjalanan kan ke drop off atu singgah dulu ke Maharaja menjig sekajap kan marm up dulu nya. Di sana Azman belurih anak aji-aji 2 ekong barat sekilo labih alat 5 minit lapas atu jig Ameng lagi kana makan " apa ikan ini manyak kuat wooo". Sekalinya naik banglus punya keraja patut tah kuat lapas atu Latif pun belurih banglus jua ada tapi ngam kan menaikkan lapas tia jua dari mulutnya.
Dalam setangah jam di sana barutah kami naik ke atas lagi menjig di takat cantik di sana tah durang belurih aji-aji atu mula-mula Azman belurih dalam berat belasan kilo inda batah atu Ameng lagi belurih aji-aji.
Senjata yang durang pakai menjig ani lagi inda alang-alang iatah inda belawanan ah aji-aji atu sekajap saja udah naik lauk ah, spool durang makai stella 20000, sama accurate twin spin kalau joran nya durang makai jigging master PE 5-8, fisherman PE 8, smith rod PE 6. Semua lauk atu di catch and release saja.
Text oleh Hj Win, terima kasih Hj Win lain kali lagi ah ok tu bro.
Siuk plang ni mengail inda jua sakit badan ni.

Tapi panas ni ah pasalnya angin atu macam nada bah.


Cemana tah keadaan aing masa bisdia di drop of f hari minggu ah.


Iatah yang kana galar macam ceramin ni keadaan aing macam ani ah.



Languran

Aming belurih menjig di Maharaja ada jua kali 5-6 kilo beratnya.


Tengiri

Wednesday, 23 June 2010

Popperazi turun di Tutong semasa cuti sekolah bersama Joule Geng Lumut Anglers. Diantara lauk-lauk yang bisdia belurih tengiri, yu sirip hitam sama tungkul. Tengiri atu malar ada makannya tapi malar jua mis, kadang-kadang dikait ah ekong dikepala ia menyambar, dikait karang arah kepala arah ekong disambarnya. Pandai jua banar ah tengiri ani ah, nanti tah belajar lagi orang pakar atu.
Popperazi

Iatah ganya ni antara ulih-uli mancing masa cuti skulah ah. Tengiri atu dalam 6.5kg, 5.5kg sama 2kg. Betaris jua muha lah luan-luan turun siang saja atu heheheh.

yu

Yu sirip itam ani baru jua pernah belurih ni biasanya meliat dalam CD ganya, ada jua dalam 3-4kg beratnya.


Tengiri Sama Tungkul

Tungkul atu ada jua 8 ekong ada yang besar ada jua yang damit.

Selungsong

Tuesday, 22 June 2010

Di malam kami turun mengail di Ujung Sapuh dari pukul 7.30 sampai pukul 10 mlm, pasal kan hujan iatah kami balik atu. Sekalinya kana jua hujan masa kan menaikkan perahu ah. Mula-mula
Pa-iring, CP Awie sama Raman saja, udah meliat cuaca atu bisai lagi pun inda jua kan akhir naik, aku sama Fian ikut tah jua. Di Ujung Sapuh aing masa atu lakat lagi surut tapi inda jua luan melajak lah. Ada jua perahu lain memukat menggagar kembura behampiran tempat kami mengail atu, iatah kali pasalnya inda berapa makan atu. Fian saja yang belurih selungsong dalam 3kilo lah, atu pun tekait arah ekong ganya. Mun kan rezeki atu ah macam-macam tia gayanya kan belurih atu. Alhamdulillah ada jua rezeki walaupun sekong.



Hadi

Friday, 18 June 2010

video

Jigging

Thursday, 17 June 2010

Yang paling relax menjig ani Padamit bah pasalnya duduk ganya inda payah bediri menjigging ah. Jangan tah digambar nyangku inda jua nampak mua kan. Inda kira masa taduh kah apa lagi mun masa beombak duduk tia ganya.



Jef sekajap duduk sekajap bediri ia menjig, ani di caruk tu ia menjig ah karang di buritan tu ia. Inda tatap bah ia ani.





Lauk yang pertama dinaikkan oleh Hj Win berah-berahan hari atu. Berah-berahan yang kedua tangkapan peribadinya, usulnya basar sedikit dari berah-berahan nya yang pertama.


Ani tah usulnya jig yang dipakai oleh Hj Win menaikkan berah-berahan ah. Yang banarnya inda kira apa saja jenis jig yang dipakai atu lah mun udah kan rezeki memang jua belurih tu. Pasalnya kediaku sama G-Mi pernah menaikkan berahan ani makai jig belainan bukan yang macam ani bah.Yang penting inda sangal bah menjigging atu inda putus asa bah.


Ani nah diantara jig yang dipakai ada lagi yang lain tu inda tegambar, macam-macam udah jig dicuba alum jua ada lauk yang sudi menyambar jig aku atu. Ada plang sambarnya atu tapi lapas tia ganya alum tah kan rezeki ku tu. Tapi inda apa lah berusaha jua udah tu inda mau yang ani cuba lagi yang lain, inda putus asa lah. sabar saja mungkin ada rezeki ku tu karang mana tau kan.


Balik-balik jua udah mencuba alum jua ada lagi makannya. Baiktah tani menungkul kajap eh tu ia banyak belumpatan ah memberi geram hati jua meliat tu. Bah mari tah menunda sekajap lapas atu ke Jasra tani lagi.

Kami bagi peluang ah c Jef tuk menunda menarik sama menaikkan. Alum lagi jauh menunda ada tia sambarnya, punya lah iski c Jef menunggkul atu eh ia ganya tau tu.


Becampur-campur bah ada basar ada jua yang damit. Tungkul/bekulan sama banit/mangkuk-mangkuk.

Ada jua kali dalam 20 labih ekong udah tah kami, lapas tu mencuba kami lagi menjig di Jasra.

Berah-berahan

Ani udah dirumah ni, tdi di laut alum puas begambar. Berahan ani labih besar dari lurihnya sehari atu, yang ani 5.5kg yang sebelum ani 4.7kg. Ada kemajuan lah makin basar lurihnya ani. Sekali ani lagi mun turun memang labih basar dari ani lagi mudah-mudahan jua lah.
Hj Win ani mengulur jig sambil menunggu jig atu sampai ketanah menunu sigup ia dulu, eh bila kan sampainya jig ani ringan jua rasanya ah baik tah gulung eh. Rupanya ada lauk udah tu padantah inda mau sampai, terelease jua sekali sekala eh twin powernya ah. Sudah hampir rupanya berahan eh cana ni ah kait sama siut lagi inda ada ketinggalan di rumah bah, sekalinya ditangkap tah ganya masa ia kipat2 ah Alhamdulillah baik jua ia inda berapa kuat lagi bah.


berahan 5.5kg

Tengiri

Yang banarnya putus udah tali jig nya atu bah baik jua ada lagi pemata yang 2 atu di bawah, sana tah ganya tengiri atu menyangkut arah badannya atu pun carik bah udah. Iatah rezekinya tu kalau kan dikira ah boleh lapas bah tengiri atu sedikit ganya sangkutnya atu bah. Beratnya 5.5kg tengiri ah. Boy ani model saja ni bapanya yang belurih ani G-Mi.

Bemasa (GT)

Macam-macam udah jenis jig dicuba jig siang jig malam, ahirnya belurih tah jua GT di Jasra ah. Iatah ganya ni lurih ku kelamari ah atu pun ah sama jua ceritanya tekait dibadan bah iatah barat menarik ah fikir tah yang mega. Ada sekali atu kana sambar udah separuh udah menggulung dapat ia lagi melapaskan, atu ia plang yang nyaman hati tu aku yang geram hati olehnya.
Bemasa ani 3.3kg beratnya. Batah udah inda menaikkan GT iatah yang pertama ni tahun ani.




Tungkul / bekulan, banit / mangkuk-magkuk

Udah inda ada lagi makan menjig atu, ahirnya menungkul kami. Kali ani bedua kami menunda kiri kana bah aku sama c Jef di caruk, Hj Win sama G-Mi diburitan. Iatah inda batah kami belurih tu bebalas-balas bah kami menaikkan ah, kadang-kadang dua dua kami menaikkan. Ada dua tiga kali atu panuh bah pemata ah berisi lauk iatah barat tu menarik. Alhamdulillah panuh jua coldbox lah oleh tungkul ah 75 ekong semuanya. Cuba tah fikir kalau kami menunda sepanjang hari atu.










jigging

Saturday, 12 June 2010

Hari Khamis 10 Jun kami turun untuk menjig lagi tapi kan mencuba jua mengail dasar kali ani. Capt. Precious, Padamit, G-Mi sama Hj Win, dalam pukul 4 ptg kami tolak dari rumah, dalam perjalanan menuju ke Jerudong atu udah turun hujan labat lagi tu. Popperazi udah menunggu di Jerudong siap sama umpan, minuman sama nasi nya. Macam biasa singgah membali minyak dulu lapas tu membali ais, makanan sama minuman.


Udah kami sampai di penurunan perahu hujan pun makin bekurangan tapi alum plang taduh banar. Kuat udah hati atu kan turun, kurang pengalaman mengenai cuaca ani, inda lagi ingau kan hujan turun saja lah. Kira-kira labih 5 km perjalanan ombak atu makin basar berangin lagi tu, kami taruskan jua. Makin jauh makin basar tia lagi ombaknya ah ahirnya bepatah balik tah kami jua, turun sikit saja lah. Sambil menunggu taduh menganjun kami dulu mengambil umpan hidup, ada jua lah temanung, sulai, temanung besurat. Masa kami menganjun atu ada sebuah perahu mengampiri kami, dapat jua lah becerita-cerita sekalinya ada jua bisdia ani tekilala rupanya geng cincangman. Kan mencuba nya di kawasan sini ani, puas udah mengail di Tutong atu kan mencari languran bah nya. Kira-kira udah cukup umpan atu cuaca pun taduh sikit, baru tah kami naik menuju takat-takat yang di kawasan Maharaja sama Jasra ah.

Udah sampai ke tempat yang dituju atu, tarus tah kami menjig. Lapas berapa kali mencuba inda jua ada makannya atu pindah kami lagi arah lain, di sana baru tah ada makannya Hj Win belurih berah-berahan, G-Mi belurih lingkuh. Banyak jua makannya atu lah tapi putus tia ganya ada yang lapas. Lapas Hj Win menaikkan berahan atu ada lagi 2 buah perahu kan mencuba jua mengail di sana. Batah udah inda makannya pindah kami lagi ke Jasra, ramai jua orang lain yang mengail sana atu lah. Hujan pun lakat lagi turun, betaduh tah kami di sana sambil mengail dasar sama jigging jua lah. Iatah Capt. Precious ganya belurih tawih, languran sama tungkul ah. Iatah ganya lurih kami tu berahan, languran, tawih, lingkuh sama tungkul ah.

Languran

Languran ani Capt. Prcious belurih ni dalam 3 kilo lah beratnya.

Lingkuh

Lingkuh ani G-Mi ni yang belurih menjig, baik jua ia makan atu lurus ah pemata mun abis dikulumnya jig atu memang putus tu. Fikir tah bemasa kuat bah tarikkannya atu. Mulanya larui yang makan jig atu, baru tah lingkuh ani lagi menyambar larui atu. Dalam 8.5 kilo beratnya lingkuh ani.

Tawih

Tawih ani Capt. Precious belurih ni mengail dasar makai umpan basong-basong. Inda kami menyangka ni tawih ada di sana atu lagi pun jarang kan makan mun mengail makai umpan di sana atu. Syukur tah iatah rezeki tu namanya, dalam 4.6 kilo beratnya.



berah-berahan

Alhamdulillah belurih tia jua ahirnya, batah udah mengajati ni berah-berahan ah. Baru tah ku kana bagi berahan ani banyak udah jig ku tekorban. Nyaman banar hatinya eh udah naik berahan ah yang basar lagi tu 4.7 kilo bah tu beratnya. Berkat sabar atu tu sama usaha berterusan inda sangal-sangal menjiiiigg saja tarus, tapi yang banarnya sangal plang tu ah ganya kan belurih atu inda tia peduli sangal kah inda kah. Udah belurih ani macam hilang sangal atu ah makin rajin tia plang menjig.
Tahniah Hj Win dapat lesen berah-berahan, senyum lah udah belurih atu. mispun jua kalat mata dari dimalam inda tidur. Sekali lagi eh senyum ah ok.

Ah catu lah baru ia orang nyaman hati usulnya, jangan tunjukkan kalat mata atu.

Jangan marah Hj Win ah saja-saja bah.

tungkul

Tungkul ani lurih menjig di Jasra ni.

Kerapu Tiger

Monday, 7 June 2010

Uncle c Ah meng inda tau namanya yang belurih kerapu tiger ani di Drop Off anggaran dalam 6 ke 7 kilo lah beratnya. Alum batah ia menggulung suruhnya tia c Ah Meng meneruskan sampai naik. Ngalih maa batu suda 1 kilo ikang lagi wah manyak berat wo.



Amber Jack

Hari minggu lapas 6 Jun ah, kami turun ke Drop Off membawa c Ah Meng sama geng nya. Dalam pukul 7 lah kami tolak dari Jerudong. Mula-mula kami singgah dulu di takat cantik sebelum meneruskan ke Drop Off. pasalnya hujan turun iatah yang 2 orang atu takut sikit, sini ampir punya takat tida ada ka itu sana ujan maa pancing sini dulu laa ok. Mengail tah kami dulu di takat cantik sambil menunggu-nunggu hujan atu taduh baru tah kami naik lagi. Ah Meng saja belurih tengiri menjig dalam 6 ke 7 kilo lah tapi jig nya hilang, sekali atu lapas inda tau apa lauknya lah.

Taduh udah sikit lagi pun inda ada lagi makannya, baru tah kami ke Drop Off. Di Drop off Ah Meng inda mengail berehat ia ganya sama nunggu orang minta jamin menaikkan lauk. 3 kali Ah Meng menaikkan lauk lurih uncle nya ah. Mula-mula Amber Jack anggaran dalam 15-16 kilo lah," ini ikan paloi wo dia kuat maa lagi pun ah ini ikan murah saja maa, paloi punya ikan tapi siuk main laa". Lapas atu kerapu tiger 6-7 kilo, "wo tiger laa ini bagus punya ikan, ini ikan manyak mahal wo ini macam punya ikan tida apa laa". Iski banar bisdia udah naik kerapu tiger atu eh, tarus Ah Meng ambil gambar uncle nya sama kerapu atu. Sekali lagi lauk durian-durian atau padas-padas dalam 2 kilo lah. "Ini kali ikan apa ah, tiger laa tiger bagus punya ikan laa" sekalinya naik "wo lulian laa lulian ini pun bagus maa"
Inda banyak lah lurih kami di Drop Off atu, pasalnya kami mendulur bisdia ani mengail ada jua lah sekali sekala kami ngail atu. Pisang Emas, kurisi india, rubi, amber jack, kerapu tiger, tengiri.
Pukul 3 ptg balik tah kami dari drop off singgah lagi di takat cantik inda ada makannya. Lapas atu singgah kami lagi di takat Maharaja ada 2 buah perahu menunda tungkul banyak jua lurihnya bisdia atu inda batah-batah nunda ada makannya. Di Maharaja ani aku ganya belurih menjig berah-berahan 7.4 kilo. Lapas atu baru tah kami balik, tengiri sama berah-berahan inda lagi tegambar.

Berahan

Tuesday, 1 June 2010

Hari minggu kami turun lagi kan menjig di lubuk biasa. Padamit, G-Mi, Irman-Kanai, Dini, Jef-Jeruju sama Fian. Dalam pukul 7mlm kami tolak dari rumah Pa-iring mengantar kami ke Jerudong udah balik makai kereta Irman-Kanai. Macam biasa singgah lagi tu membali minyak, ais, minuman, makanan sama asap-asapan lah. Kami menunggu Irman-Kanai lagi pasalnya ia ahir sikit. Sudah ia ada tarus kami menuju Maharaja masatu kira taduh lah. Sampai saja sana kami pun tarus menjig, mula-mula Fian kana tarik udah naik rupanya tungkul masa kan mengangkat ke perahu lapas tia lagi alum tah kan rezeki tu. Lapas atu ada jua lagi tariknya tapi lapas tia ganya, G-Mi menaikkan languran, udah giliran ku kana tarik atu naik eh languran 3 kilo labih. Udah naik languran atu inda tia lagi ada makannya, pindah tah kami lagi arah lain. Kesana kemari jua udah mencuba alum jua ada lagi lauk yang sudi menyambar jig kami ani.
Mencuba jua popping masa di Jasra atu, iatah ganya lingkuh ah 5 kilo labih jua. Dalam pukul 2 pagi kali baru tah ada lauk yang teliat jig ku ah, 2 3 kali mempam baru tah menggulung kuat lagi tarikkannya ani ku fikir tah bemasa bah udah ampir rupanya berahan, Syukur Alhamdulillah macam-macam udah jig kami cuba ani tah hasilnya usaha atu.
Dalam pukul 4 pagi kami atu kan mencuba di takat-takat ampir iron duke atu, tapi inda kami jadi pasalnya umbak makin kuat berangin lagi abis basah-kuyup semua. Yang duduk pun inda tatap atu bah, meliat keadaan macam atu balik tah kami tarus lah. Iatah ganya tu lurih kami berahan 1, lingkuh 3, titir 3, laroi 1 sama sulai 3 ekong.
Berah-berahan 5.1 kilo

Berahan-berahan sama languran 3 kilo labih ah.

Languran

Languran ani aku belurih menjig ni dalam 3 kilo labih baratnya, iatah ganya ni satu-satunya languran malam atu inda ia bekawan-kawan bah. Yang lain atu ada jua lapas tia ganya mis kol ganya bah.


Lingkuh

2 ekong lingkuh yang kuning G-Mi sama Irman Kanai belurih menjig tu, sekong lagi aku belurih popping. Inda jua batah menaikkan pasalnya inda lagi jauh bah baru tah ia menyambar. Bukan macam bisdia dari bawah apa inda, kuat bah jua lingkuh ani fikir tah bemasa. Irman-Kanai makai Ocea Jigger, G-Mi makai Shimano Navi, aku makai Daiwa Daiwa Fream Kix 4000 ganya tu.

Lingkuh 5 kilo labih tiap sekong

Jadual Aing Pasang Surut