Pantai Serasa

Begambar kenangan bersama ironsilk semasa beliau mengail sorang2 di ujung pantai serasa.

Pantai Serasa

Ani mengail sama keluarga di Pantai Serasa disebelah Ungah Garden ah, bukan saja mengail sambil mukat sama membintur jua lah. Bermalam jua selajur di sana lah tapi tengahmalam ada jua yang balik lah.

MAKLUMAN

Assalamualaikum semua PA, mata kail untuk jig ani ada di dalam perahu PRECIOUS masa kitani mengadakan Ungah Grand Prix 2009. Iatah mata kail jig ani inda ada orang tau siapa yang punya. Kalau ada diantara ahli atau orang jemputan yang punya mata jig ani boleh lah mengambil arah Pa-iring di Lambak atau hubungi Padamit kah.

Sekian harap maklum terima kasih.

BELIDA

Belida ani bisdia belurih di lubuk pulau pada hari sabtu 26 dec 2009. Yang banarnya mengail udang galah plang bisdia ani belida tah plang yang makan alhamdulillah rezeki jua ni.


Fian

Pg Aji

KERAPU

Kerapu ani bisdia belurih merawai di muara, Jimi, Dini sama Boy (jimi jr)

LINGKUH

Lingkuh ani C Jimi belurih mengasting di Ujung Sapuh dimalam, sebelaum ada udah tariknya tapi lapas mungkin ungah kali lah.


Boy (Jimi Jr)

UMPAK

Aku atu yang banarnya mengandang udang di Ujung Sapuh atu, masa menunggu andang atu belabuh iatah melabuh kail ku jua makai udang mati ah mengail beranyut lah ganya. Ada jua dalam 5 minit belabuh kail ah nada makannya ku gulung tia, iatah masa ku menggulung atu atu baru tia meranjat bah, sekalinya naik rupanya umpak ku fikir tah selungsung. Alhamdulillah rezeki.

TOPI / CAP

Topi ani baru bebuat ni harganya dalam $10.00 satu. Masani masih menempah lagi 8 yang ada lauk atu lah bukan yang PA atu ah, mungkin esuk siapnya iatah siapa yang mau atu boleh hubungi Padamit ok. Topinya semua hitam tu tapi kalau ada yang mau warna lain ada jua merah, putih sama biru.

LAPIH

Lapih bisdia Dini, Jimi sama Boy (jimi jr) belurih merawai di Muara dimalam masa berangin ah.

Boy (Jimi Jr)

POPPER, CAST, JIG

Koleksi Peribadi C.P Awie

Aku atu memanyap-manyap barang kail ku, rupanya banyak udah ‘lures’ ku ani udah dikumpulkan.. ani saja kan berkongsi antara lures kegemaran ‘Preciousanglers’.

Barisan atas untuk casting dan barisan bawah untuk trolling (ada yang belum bepakai lagi ni.. jenamanya macam-macam ada.. yg sotong plastic atu kan ikut cara orang putih kononnya alum tah pernah belurih jarang pakai jua..



JIG – ani pun banyak yang terkorban dah, payah kan mbagi tau mana yang ‘heng’.. kalo aku kegemaran ku mesti ada warna ‘pink’…

Ani popper yang bebali dari kedai pancing.. iatah nganya tinggal nya ni banyak udah yang menjadi anting-anting bemasa.. (pasal putus dianggungnya sama poppernya). Koleksi yang kami mesti tedapat ialah jenama ‘HALCO’ (yang di barisan atas) mesti tedapat ni, pasalnya pernah kami beganding popping pakai popper yang berlainan yang halco jua disambarnya.. antara semua jenama halco ani yg warna pink/kunig atu yang terbaik pasal atutah 2 buting ku tedapat (satu spare yg satu atu sayang berehat udah lapas digasak bemasa 31 kg). Jenama lain ‘Adhek Bali (barisan atas sebelah kanan), termasuktah jua jenama Williamson, duel, yozuri dan seven seas (yg ku manang Ungah GP).



Ani antara Popper yang dibuat sendiri,(padamit jua yang punya idea), semuanya dibuat daripada ‘pine wood’. Trademarknya mestilah ‘PRECIOUS’ dan namanya macam-macam antaranya golden banana, kelabutan, sexy lady, dori, blue trevally, nemo, awangspider, yellow belly, blue marlin, pink lady dan sebagainya.. banyak jua udah takah gigi bemasa…

Bah atu saja dulu, iatah antara koleksi ku yang dapat ku gambar.. luan banyak atu payah jua kan memilih mana yang kan dipakai, membeli udah tackle box besar nda jua muat.. iatah banyaknya jadi perhiasan di rumah.


Terima kasih CP Awie kerana sudi mengongsikan lures nya ani popper yang bebali sama yang membuat sendiri, jig sama cast nya. Timbulnya buah fikiran untuk membuat popper sendiri atu disebabkan inda mampu bah luan malar kan membali mahal bah harganya atu. Asal putus saja tepaksa tah membali. Iatah cuba-cuba membuat atu akhirnya dapat jua dipakai banyak juah udah di sambar bemasa popper handmade atu, puas jua hati bebaloi lah rasanya. Masani banyak udah diantara preciousanglers membuat popper sendiri.


Lain kali koleksi spool sama joran lagi ok, bukan saja kan perhiasan rumah dapat jua dibuatkan perhiasan dada blog ani kan inda ja. Geng yang lain mun kan mengongsikan peralatan lain apa saja lah dialu-alukan emailkan saja ah ok.

UJUNG SAPUH

Iatah ganya lurih kami ni dimalam ah mengail, membintur sama memukat di Ujung Sapuh. Ketamnya campur-campur ada ketam kalok, ketam suri, ketam kumpal ada jua kerapu sekong masuk bintur ah. Ungah damit 2 ekong, kerapu 2 ekong ganya lurih kami ngail ah. Mukat ada jua kembura, tangat, titir, lauk putih, garut2, usus. ketambak, bilis macam-macam lagi lah.

Inda lagi tekanang kan menggambar ketam ah kami buat tia ganya dalam baldi, inda lagi bepayuk tu.

MANGROVE PARADISE RESORT

CP Awie sekeluarga semalam di MANGROVE PARADISE RESORT hari Ahad sampai hari Isnin lah.

Shasya, Aina sama Ryan

Shasya yang paling tahan mengail samapi pukul 3 pagi bah, atu tepaksa disuruh beranti mun inda sampai ke pagi pakah ia eh. Tu lauk ketambak lurihnya ah.

Ujung Sapuh

CP Awie sama sekeluarga mengai di Ujung Sapuh. Nada makannya ungah atu selungsong pun nada makan tapi ada betimbulan menguyung lauk bedamitan ah, dikasting pun inda jua ia mau sekalinya buntal tah plang makan kasting ah eh macam inda kan pecaya ganya belurih udah atu pecaya tah jua hahaha

CP Awie sama bininya Hana

Ryan CP Awie jr

UNGAH

Dimalam 21 dec kami turun ke Ungah Garden Ujung Sapuh kira2 maghrib lah kami sampai sana. Sebelum mengail atu melabuh pukat kembura kami dulu lapas atu baru tah mengail.

CP Awie sama Pudin sedang mengusai-ngusai kail

Pudin mencuba gigi nya mau kah inda putus tangsi 60Ibs ani ku gigit ah

Berehat plang ganya bukan tidur eh sagal punggung bah macam kira menyandarkan belakang lah

Khusuk jua Hj Win atu ah digambar pun inda ia menauleh, liat tu Pudin sampat jua menauleh

menunggu-nunggu kail kana sambar lauk dapat jua lagi becerita-cerita

Hj Seruji (ZEE) ganya seorang yang makai baju seragam PA ah

Hj Win belurih sekong ungah dalam 1kg lah baratnya, Padamit belurih ungah yang damit ada jua 400g pakah sama Hj Seruji sekong kerapu dalam 500g lah. Mukat kembura ada jua lah tapi inda banyak campur2 lauknya.