UNGAH GRAND PRIX

Bahagian 3

Selepas 4 jam mengail dengan harapan melambong agar belurih ungah yang besar atau banyak. Bermacam-macam cara yang digunakan, ada yang makai krikan tangsi dari 50Ibs sampai 70Ibs
inda payah makai perambut sebatang saja ada yang bebatu ada yang inda bebatu tu. Tapi ada jua yang makai perambut 30Ibs ka 40Ibs. Yang makai joran pun sama jua ada yang beperambut bebatu ada yang inda, ada yang mengumban jauh ada yang ampir, ada jua yang makai pelampong untuk mengail timbul.

Bermacam-macam jenis lauk yang bisdia belurih ani yang banyaknya tantulah ungah lapas atu kerapu ada yang basar ada yang damit. Banyak lagi yang putus sama lapas. Iatah salah-salah bah mun makai tangsi luan basar karang inda tia jua berapa mau makan lauk atu, mun tangsi damit mudah plang lauk
makan tapi mudah jua putus tu mun tekana batu dalam aing atu bah adedeh sekali ambat ganya tu.

Umpan pun macam-macam jua yang kana gunakan ada yang makai kembura ada yang makai basong. Ada yang bebalah lagi tu ngambil isinya ganya ada jua yang sekong bulat atu. Tapi mun basong kebanyakanya bepotong 2 atau 3 sama bebalah tu selalunya lah. Ada yang suka makai kepalanya atu jua. Tapi umpan kembura lah yang ungah paling suka dibandingkan sama umpan-umpan lain macam basong-basong atau udang walaupun yang hidup tu, tapi diumpankan jauh sedikit dari batu mungkin ada lauk lain mau makan tu macam berah-berahan sama ketambak. Eh cerita pasal
mengail tah plang andang semua ahli jua udah tau ni, ganya kan memberitahu untuk orang lain bah.

Iatah lapas 4 jam menahan kesejukan sambil angan-angan belurih ungah hahaha, iatah bilang orang kelaparan. Apa lagi makan ayam sama sausage yang besalai ah iatah nyaman tu makan ramai-ramai ah ayam lagi panas tu, ada yang bebata nasi sendiri be ampit-ampitan tah nasi ah. kan semua yang duduk behampiran tampat menyalai ah bilang orang kan bediang kesejukan bah. Inda tia lagi peduli ada yang makan 3/4 ganya masak, mun sausage mengampai saja sekajap udah kana sambar tia memanaskan sedikit ganya bah. Walaupun masa sahur atu inda berapa teratur tapi Alhamdulillah semua ampit makan ada lagi belabih 2 3 potong ayam sama 2 3 ekong tamban sampai pagi ah.


Ada yang meratah ayam ganya inda jua luan lapar nya kesejukan ganya bah. Banar plang tu pasalnya angin atu kuat sampai ke pagi bah, dalam pukul 4 kali macam makin kuat angin atu tapi Alhamdulillah inda hujan, mun hujan lagi sajuk banar tia tu. Ada jua yang makan sama nasi labih nasi katok yang kami makan awal belabih 3 bungkus sama ada yang bebata sendiri membawa nasi. Jurugambar biasalah menggambar orang ia dulu lapas atu baru tah ia makan disuruhnya plang orang lain menggambar mun ada yang kan digambar-gambar. Ada jua yang membubuhkan lauk tamban yang untuk umpan atu tapi yang alum bepakai plang tu, mun ia panas-panas atu
dimakan nyaman kali tu ah inda lagi nampak telinga tu mun ngam lagi cacahnya adehdeh sia-sia pun tais liur tah ku plang nah, karang tah meliat dikapal eh kali ada kapal tunda datang.

Lapas semua udah habis makan baru tah kami menimbang-nimbang lauk, siapa belurih ungah yang paling basar, siapa yang banyak belurih, kumpulan mana yang paling banyak belurih, lauk siapa yang paling ganjil sama siapa yang mula-mula sekali belurih lauk yang diutamakan ungah lah. Pasalnya temanya jua ungah GP iatah tu. Ungah ada jua kali 5 ekong yang basar mungkin ada 2 ekong kali yang damit, kerapu 2 ekong yang basar yang damit banyak plang eh, ada lagi macam-macam jenis lauk lah yang bisdia belurih ani.