Drop Off

Kelamari kami turun ke drop off, CP Awie, Padamit, G-Mi, Popperazi sama Raman. Dari pukul 4.30am kami tolak dari Lambak, udah sampai Jerudong banyak udah yang turun ada jua yang dari di malam usulnya. Cuaca kira ok lah keadaan aing pun taduh jua dapat jua laju menjalankan perahu ah, tapi hari atu lakat lagi gelap iatah sadang-sadang saja lajunya. Mula-mula kami singgah di takat cantik, mesti kami singgah ni takat cantik ani setiap kali kami turun sebelum kami taruskan ke drop off. Di takat cantik kami menjig ganya ada jua 3 ekong tungkul sama sekong amberjack, popperazi 2 kali lapas saja mungkin tengiri sama amberjack kali jua. Menunda banit/mangkuk-mangkuk kami dulu di takat cantik atu jua kan dibuatkan umpan. Lapas atu baru tah kami ke drop off, menjig kami dulu nada makannya baru tah kami makai umpan. Dalam 4-5 tempat kami cuba ada saja makannya ganya inda ia batah-batah. Sekali atu kami menarik tali sauh belum lagi separuh putus tia jua tali sauh ah, baik jua Raman tau tali sauh atu putus, tarus tah kami mengaga buoy atu baik jua sampat mengambil talinya sebelum ia tinggalam sama sauh. Dalam pukul 4 ptg mencuba kami lagi di takat cantik nada makannya, lapas atu di Maharaja nada jua makannya balik tah kami. Masa atu berangin udah ombak pun macam makin basar lapas Champion hujan tia lagi beguruh bekilat, baik jua nda batah hujan atu sajuk bah. Alhamdulillah selamat sampai ke darat di Pantai Jerudong.

G-Mi, Raman, Padamit, CP Awie, Popperazi

Amber Jack (aji-aji), rubi, tungkul, pisang emas, kurisi kaling, kerapu, kerapu tiger, awat-awat, suhong/senuhong.