popping sama jigging

Malam minggu ari atu ah 4 sep. kami turun kan menakat di kapal karam Maharaja ah, Kira pengabisan lah sebelum hari raya ani, sekalinya ada jua lagi yang turun di malam sekong ganya bisdia belurih berahan lah. Capt Precious Awie, PAdamit, G-Mi sama Fiyann, yang banarnya kami ani kan mengail di takat-takat lah, nada belurih basong kan umpan popping sama jigging tah jua jadinya, ada plang umpan sulai atu ganya inda berapa mau bah. Udah tekandung hujan atu tepaksa tah kami betaduh jua dulu ah takat timbul ah mana jua ulah, ada 4 buah lagi perahu lain pun ikut betaduh jua bah. Angin lagi kancang tu baik jua inda jadi ke ombak Alhamdulillah.

G-Mi sama Fiyann menediakan makanan untuk berbuka puasa. Dalam perjalanan atu sebelam sampai Champion inda lagi batah kan baduk iatah belabui tah kami dulu untuk besungkai ala kadar saja, nasi katok, mee tiaw goreng, ayam salai, ada jua kepala languran masak putih kira nyaman lah makan masa atu.

Kadang-kadang membari tekanang jua anak bini di rumah masa sungkai atu, mana jua ulah kan mencahari tepaksa tah jua di tinggalkan. Alhamdulillah batah-batah ke laut ani nada halangan untuk turun inda kira siang atau malam lah.

Alhamdulillah 9 ekong languran, 2 ekong berahan sama lingkuh 4 ekong, mun inda tengiri sekong tu sejarah kami tu menaikkan tengiri waktu malam. Mula-mula difikir lingkuh udah hampir kan menaikkan ganya lagi rupanya tengiri. Fiyann unjuk udah kait bisdia inda mau inda payah lingkuh ni, ani nah menyasal inda beguna yang banarnya alum tah kan rezeki tu.

Berahan ani aku belurih mengail dasar ni makai umpan sulai ah di kapal karam Maharaja ah. Iatah ganya sekong ani ni lurih ku, jigging ada plang makannya lapas tia ganya bah, popping ada sekali putus tia jua ah leadernya bah popper buatan tangan ku atu abis lah jua.

Fiyann baru jua dapat lesen jigging languran malam jumat lapas ah, Malam atu belurih ia lagi yang basar pernah ia menaikkan lah hampir jua kali 3 kilo. Mun inda dapat lesen popping ia jua malam atu ganya alum batah bemain lapas tia, atu pun makai popper buatan tangan jua tu.

Ani pemungut cukai yang taat setia ni lingkuh ah, inda pernah kami inda belurih ni perasaan ku lah. Setiap kali popping atau jigging mesti ia ada ni, kedia tah yang mengerajakan jig sama popper ni. Kadang-kadang atu ah masa mengulur bah tau-tau ringan selajur nah udah disambar lingkuh nah, mun putus masa bemain atu baik jua lagi kan.

Yang lawa lakat usul kulitnya atu aku belurih tu mengail dasar, sekong lagi G-Mi belurih menjig dalam 2 kilo labih sikit lah tiap sekong.

Capt. Precious Awie 3 ekong yang basar lah ia belurih popping sama jigging, G-Mi sama Fiyann sekong yang damit 2 ekong yang basar jigging saja, semuanya 9 ekong.