dasar sama jiging

Huzair

 Bemasaluihnya menjig walaupun jorannya patah tapi lauknya naik jua hahaha.

 Rozaizam, Huzair

 Ani luih menjig saja ni bemasa sama languran

 Hj Win, Nizam, Rozaizam, Huzair, G-Mi

Bangga ku meliat Hj Win makai baju atu eh

Rozaizam

kan dibagi arah kucing lauk atu inda sanggup bah kucing menjaling ia ganya

Menakat di Maharaja

 Mengail dasar di kawasan Maharaja

languran, bemasa sama kerapu luih menjig tu

Cinta Laut Pertama

Tahniah buat Gunawan kerana beroleh seekor ikan bekalang yang beratnya hampir 4kg. Inilah ikan pertama beliau memancing di laut dan inilah ikan pertama juga beliau tangkap dan juga ikan terbesarnya. Alhamdulillah, Precious anglers berjaya menyumbangkan kenangan manis buat beliau dan kami juga turut gembira. Kegembiraan beliau ketika itu mengenangkan kenangan pertama kami dulu juga.


Rakan Gunawa, Keong, juga berjaya mendaratkan seekor bekalang juga yang beratnya hampir 5kg.

Laporan,
Languran

Kapal karam Maharaja

Gambar-gambar ani disumbangkan oleh Popperazi. 26 Ogos malam jumat ari atu bisdia turun sama Pg. Zul, CoachDean (Pudin), Popperazi pun ikut jua. Iatah ni lauk-lauknya yang bisdia belurih ah, baru puas hati nah. Sangal jua tangan pakah eh nada banyak berehat usulnya.

kepayang-kepayang

jukot

lapih

anduping lausu

languran

ungah batu (guntur)

sulit

santak

ambong-ambong

pari

Jigging

Kelamari G-mi sama Popperazi membawa Ameng xcadico sama 2 orang lagi kawannya kan menjig saja di kawasan Takat Cantik, Maharaja sama Jasra. Ameng mau menaikkan berahan, berapa trip udah ia ikut alum tah pernah menaikkan berahan nya Ameng. Trip kali ani pun inda jua ada ia menaikkan berahan. Eh G-Mi aku mau makan bah itu berahan boleh tukar sama aku punya GT kah, bukan apa aku geram ati sama itu berahan. Bah ok kau ambil lah itu berahan.

G-Mi, Ameng xcadico, Khairul, Ayai, Popperazi

Capt. Precious Awie masbuk begambar untuk kenang-kenangan bersama anglers yang lain.

Jigging

Iatah ganya ni lurih bisdia menjig kelamari ah, lingkuh 1, berahan 1, bemasa 1, tungkul 2, tengiri 2.

Jigging

Yang paling relax menjig ani Padamit bah pasalnya duduk ganya inda payah bediri menjigging ah. Jangan tah digambar nyangku inda jua nampak mua kan. Inda kira masa taduh kah apa lagi mun masa beombak duduk tia ganya.



Jef sekajap duduk sekajap bediri ia menjig, ani di caruk tu ia menjig ah karang di buritan tu ia. Inda tatap bah ia ani.

Lauk yang pertama dinaikkan oleh Hj Win berah-berahan hari atu. Berah-berahan yang kedua tangkapan peribadinya, usulnya basar sedikit dari berah-berahan nya yang pertama.

Ani tah usulnya jig yang dipakai oleh Hj Win menaikkan berah-berahan ah. Yang banarnya inda kira apa saja jenis jig yang dipakai atu lah mun udah kan rezeki memang jua belurih tu. Pasalnya kediaku sama G-Mi pernah menaikkan berahan ani makai jig belainan bukan yang macam ani bah.Yang penting inda sangal bah menjigging atu inda putus asa bah.

Ani nah diantara jig yang dipakai ada lagi yang lain tu inda tegambar, macam-macam udah jig dicuba alum jua ada lauk yang sudi menyambar jig aku atu. Ada plang sambarnya atu tapi lapas tia ganya alum tah kan rezeki ku tu. Tapi inda apa lah berusaha jua udah tu inda mau yang ani cuba lagi yang lain, inda putus asa lah. sabar saja mungkin ada rezeki ku tu karang mana tau kan.

Balik-balik jua udah mencuba alum jua ada lagi makannya. Baiktah tani menungkul kajap eh tu ia banyak belumpatan ah memberi geram hati jua meliat tu. Bah mari tah menunda sekajap lapas atu ke Jasra tani lagi.

Kami bagi peluang ah c Jef tuk menunda menarik sama menaikkan. Alum lagi jauh menunda ada tia sambarnya, punya lah iski c Jef menunggkul atu eh ia ganya tau tu.

Becampur-campur bah ada basar ada jua yang damit. Tungkul/bekulan sama banit/mangkuk-mangkuk.

Ada jua kali dalam 20 labih ekong udah tah kami, lapas tu mencuba kami lagi menjig di Jasra.

jigging

Hari Khamis 10 Jun kami turun untuk menjig lagi tapi kan mencuba jua mengail dasar kali ani. Capt. Precious, Padamit, G-Mi sama Hj Win, dalam pukul 4 ptg kami tolak dari rumah, dalam perjalanan menuju ke Jerudong atu udah turun hujan labat lagi tu. Popperazi udah menunggu di Jerudong siap sama umpan, minuman sama nasi nya. Macam biasa singgah membali minyak dulu lapas tu membali ais, makanan sama minuman.

Udah kami sampai di penurunan perahu hujan pun makin bekurangan tapi alum plang taduh banar. Kuat udah hati atu kan turun, kurang pengalaman mengenai cuaca ani, inda lagi ingau kan hujan turun saja lah. Kira-kira labih 5 km perjalanan ombak atu makin basar berangin lagi tu, kami taruskan jua. Makin jauh makin basar tia lagi ombaknya ah ahirnya bepatah balik tah kami jua, turun sikit saja lah. Sambil menunggu taduh menganjun kami dulu mengambil umpan hidup, ada jua lah temanung, sulai, temanung besurat. Masa kami menganjun atu ada sebuah perahu mengampiri kami, dapat jua lah becerita-cerita sekalinya ada jua bisdia ani tekilala rupanya geng cincangman. Kan mencuba nya di kawasan sini ani, puas udah mengail di Tutong atu kan mencari languran bah nya. Kira-kira udah cukup umpan atu cuaca pun taduh sikit, baru tah kami naik menuju takat-takat yang di kawasan Maharaja sama Jasra ah.

Udah sampai ke tempat yang dituju atu, tarus tah kami menjig. Lapas berapa kali mencuba inda jua ada makannya atu pindah kami lagi arah lain, di sana baru tah ada makannya Hj Win belurih berah-berahan, G-Mi belurih lingkuh. Banyak jua makannya atu lah tapi putus tia ganya ada yang lapas. Lapas Hj Win menaikkan berahan atu ada lagi 2 buah perahu kan mencuba jua mengail di sana. Batah udah inda makannya pindah kami lagi ke Jasra, ramai jua orang lain yang mengail sana atu lah. Hujan pun lakat lagi turun, betaduh tah kami di sana sambil mengail dasar sama jigging jua lah. Iatah Capt. Precious ganya belurih tawih, languran sama tungkul ah. Iatah ganya lurih kami tu berahan, languran, tawih, lingkuh sama tungkul ah.

Jigging d Maharaja sama Jasra

Udah kan jalan dari rumah ku telefon lagi Jef. "Jef, ikut turun malam ani menjig kitani ni tempat biasa ah", "ededeeh aku ani kan main bola inda lagi jauh padang ni, kalau inda mau ku join ni, bah karang tah ku menelefon kau lagi apa usulnya join ku ni" nya Jef. Alum sampai 2 minit ada tia menelefon semula Jef ah, "bah aku ikut eh membali umpan tah ku ni 3 kilo cana cukup Bro, aku nunggu di Jerudong saja ah ok. Limpas tia jua bah padang atu, eh ku teruskan tia saja eh di laut tia udah bah fikiran ku atu iatah tarus ku telefon kau atu". Kuat banar tarikkan mengail ani ah macam tarikkan bemasa jua kali ah, bukan apa padang udah dapan mata pun inda lagi teliat bah limpas tia plang, atau pun sengaja kah tu ah, Jef ganya tau tu. Akhirnya kami lima orang tah turun

Padamit, G-Mi, Hj Win, Hj Sham sama Jef.

Dalam pukul 6 kami tolak dari rumah, Pa-iring menundakan perahu ke Jerudong singgah membali minyak dulu lapas atu membali ais, minuman, asap-asapan, roti paun tuk umpan parut bah. Nasi macam biasa Hj Win udah membali tu kadang-kadang kalau kami 5 orang dibalinya 6 bungkus ia 2 bungkus tu eh, kan jalan atu makan tia dulu tu lapas atu karang lagi tengahmalam ia sahur tu. Jef udah membali umpan 3kg basong-basong.

Udah sampai di Pantai Jerudong aing tuhur memantai 0.3 bah tu, ada jua orang lain kan turun ada jua kan naik atu lah. Kan turun atu kejumpahan kawan, G-Mi tanya kedia kan kemana rupanya tujuan kami ani sama iatah bebaya tah kami tolak ampir pukul 7 mlm dari Pantai Jerudong tarus menuju Jasra. Dalam 5km lagi kan sampai Jasra singgah kami sekajap arah lawa-lawa buluh ah kan menjig, rupanya inda lagi ada lawa-lawa buluh atu. Lapas atu ke Jasra tah kami tarus. Alhamdulillah aing masa atu pun taduh nyaman jua rasanya dalam perjalanan atu inda jua antak-antak perahu.

Sampai saja di sana tarus bisdia menjig, aku mencuba popping dulu 2 3 kali mengumban inda jua ada sambarnya baru tah ku mencuba menjig. Orang lain ada jua menaikkan kediaku sama Hj Win ganya alum bah. Jef udah hat trick tungkul, G-Mi tungkul sama languran, Hj Sham bemasa, tungkul. Mencuba ku lagi popping 2 kali mengumban ada tia menyambar baru tah kan mengancangi drag, inda sampat mempam putus tia. Nyaman udah hati kana sambar atu, sayang ku tu ah popper pisang ku atu banyak jasanya arah ku tu, rupanya GT lagi sayang kan popper ku atu. Payah tah lagi mengunjar tu pasalnya inda lagi bejual di kedai bah, inda apa lah makai popper buatan tangan sendiri saja lah.

Inda batah lapas atu pindah tah kami ke takat di Maharaja, bisdia ganya mengail sama menjig. Kediaku tidur hahaha kalat hantap bah mata ku atu tambah lagi alum ada menaikkan lauk iatah ku layan saja dulu atu mata ku atu. Inda jua nyaman banar tidurku atu eh mana inda, lakap lagur bah bisdia ani riuh bunyinya macam menaikkan lauk jua. Inda tantu rasa kan tidur kah kan mengail ni, mikirkan alum ada belureh ani mengail tah saja eh karang siang tah saja tidur lagi di rumah. Mencuba lagi menjig alum jua ada lauk yang sudi menyambar jig ku ani, cubaan jua banar eh sabar saja lah inda tah ada rezeki ku malam ani pakah. Inda batah atu pindah lagi arah lain.


Udah pukul 3.30 pagi kali baru tah ada belurih languran ah akhirnya, syukur tah jua walaupun sekong daripada inda ada langsung. Hj Win pun udah belurih languran ah 3 ekong sama bangla eh salah banglos lah. Iatah ni lurih kami languran 8 ekong, bemasa 1 , lingkuh 1, banglos 1, membangan 1, sulai 1 sama pisang -pisang 1.

Ani nah bemasa sama lingkuh Hj Sham, banglos atu Hj Win belurih tu.

Maharaja n Jasra

Kelamari petang dalam pukul 3 lalu lah kami (G-Mi (Capt), Padamit, Popperazi, Hj Win sama Jef) tolak dari Jerudong kan ke Maharaja sama Jasra. Cuaca atu sangat mengizinkan, berangin saja lah kira-kira 25km/h tapi inda berombak boleh dikatakan taduh lah tu, Alhamdulillah. Dalam perjalanan singgah kami sekajap menganjun untuk umpan hidup. Datang saja arah kapal karam di Maharaja tarus kami menjig , iatah belureh languran sama salman atu. Udah gelap sikit baru pindah ke Jasra, inda ada perahu lain kami ganya sebuah. Udah akhir sikit baru tah ada sebuah perahu datang.

Mula-mula kami datang atu siuk eh asal turun saja udah tia kana sambar alum lagi datang ke dasar bah, fikir tah languran kuat bah jua rupanya tungkul. Semua tungkul atu lureh kami menjig tu, ada jua bemasa atu lah tapi inda mau naik putus saja bah ada jua lapas. G-Mi makai krikan perambut 80Ibs pun putus jua nada peluang menarik olehnya.

Iatah lureh kami ni dimalam ah Languran, tungkul, lingkuh sama salman khan.

Orang sibuk-sibuk kan melayan tungkul ia kan menggambar tia plang bah lauk ani lagi lakat kipat-kipat, layan tah jua dulu. Ani di Jasra ni.

Ani ah kapal karam di Maharaja ni sedang menjigging.