baby amber jack

baby aji-aji

AmberJack

Iatah ganya ni lurih kelamari menjig ah Amber Jack 6kg. Ombak taduh plang hujan ganya sekali sekala lah. Kesana kemari jua udah mencari nada berapa makan, aing atu sajuk di bawah bah. Ada jua Irwan belurih tengiri sama tungkul lah baru pernah menjig janya. Banyak jua jig tekorban lah kelamari atu aku saja 3, Hj Win 3 kali jua sama Tom 5 hahaha. Ada jua putus masa belawan sama lauk lah.

Amberjack

Amberjack ani inda ku tau camana ceritanya, di mana bisdia belurih, bila bisdia mengail ni. Tapi yang tentunya memang di drop off ni. Gambar-gambar ani di sumbangkan oleh c Boy, terima kasih Boy lain kali sama ceritanya jua ah walaupun tah inda panjang asalkan ada ok tu.

Sufri

Amber Jack

Amber Jack ani yang banarnya 3 ekong ni. Popperazi belurih menjig sekong dalam 11kg lah beratnya, tapi udah siap begambar dilapaskannya semula kira tangkap dan lepas lah tu. Andang udah niatnya tu nya mun ia belurih amber jack ku lapaskan ni. Yang damit atu aku yang belurih tu. Yang basar atu Azman yang belurih.

Popperazi

Amber Jack 11kg
Tangkap dan lepas

Tahniah lagi sekali dapat lesen amberjack.

Azman (languran)

Amber Jack 9kg

Amber Jack

Yang damit belurih menjig tu, yang besar makai papar beumpan.

Yang ani makai papar beumpankan temanong sama tungkul. Makai papar yang pemata damit lagi tu baik jua banyak pemata yang menyangkut ah lauk atu, ada jua 2-3 buting pemata udah langkang. Syukur Alhamdulillah naik jua ahirnya Amber Jack 13 kilo.

Ani Raman belurih menjig di takat cantik. Ia atu saja-saja kan mencuba menjig makai CP Awie punya Saragosa 18000 atu, buat-buat menunggu Spool Navi 8000PG nya atu kana usai sedikit oleh CP Awie. Sekalinya belurih tia plang amber jack dalam 6-7 kilo lah, sadang jua batahnya ia memain pasalnya baru jua mencuba-cuba menjig ani. Kajar-kajar jua tangannya udah naik lauk atu hahaha, tahniah Raman dapat lesen Amber Jack udah ni. Yang balum dapat lesen atu jangan putus asa teruskan usaha ok.

Amber Jack (aji-aji)

Hj Win sama G-Mi turun membawa orang mencatar perahu bisdurang Ameng, Azman sama Latif ke drop off, durang ani request kan menjiging saja nda bebata umpan. Dalam perjalanan kan ke drop off atu singgah dulu ke Maharaja menjig sekajap kan marm up dulu nya. Di sana Azman belurih anak aji-aji 2 ekong barat sekilo labih alat 5 minit lapas atu jig Ameng lagi kana makan " apa ikan ini manyak kuat wooo". Sekalinya naik banglus punya keraja patut tah kuat lapas atu Latif pun belurih banglus jua ada tapi ngam kan menaikkan lapas tia jua dari mulutnya.

Dalam setangah jam di sana barutah kami naik ke atas lagi menjig di takat cantik di sana tah durang belurih aji-aji atu mula-mula Azman belurih dalam berat belasan kilo inda batah atu Ameng lagi belurih aji-aji.

Senjata yang durang pakai menjig ani lagi inda alang-alang iatah inda belawanan ah aji-aji atu sekajap saja udah naik lauk ah, spool durang makai stella 20000, sama accurate twin spin kalau joran nya durang makai jigging master PE 5-8, fisherman PE 8, smith rod PE 6. Semua lauk atu di catch and release saja.

Text oleh Hj Win, terima kasih Hj Win lain kali lagi ah ok tu bro.

Siuk plang ni mengail inda jua sakit badan ni.

Tapi panas ni ah pasalnya angin atu macam nada bah.


Cemana tah keadaan aing masa bisdia di drop of f hari minggu ah.


Iatah yang kana galar macam ceramin ni keadaan aing macam ani ah.

Amber Jack

Hari minggu lapas 6 Jun ah, kami turun ke Drop Off membawa c Ah Meng sama geng nya. Dalam pukul 7 lah kami tolak dari Jerudong. Mula-mula kami singgah dulu di takat cantik sebelum meneruskan ke Drop Off. pasalnya hujan turun iatah yang 2 orang atu takut sikit, sini ampir punya takat tida ada ka itu sana ujan maa pancing sini dulu laa ok. Mengail tah kami dulu di takat cantik sambil menunggu-nunggu hujan atu taduh baru tah kami naik lagi. Ah Meng saja belurih tengiri menjig dalam 6 ke 7 kilo lah tapi jig nya hilang, sekali atu lapas inda tau apa lauknya lah.

Taduh udah sikit lagi pun inda ada lagi makannya, baru tah kami ke Drop Off. Di Drop off Ah Meng inda mengail berehat ia ganya sama nunggu orang minta jamin menaikkan lauk. 3 kali Ah Meng menaikkan lauk lurih uncle nya ah. Mula-mula Amber Jack anggaran dalam 15-16 kilo lah," ini ikan paloi wo dia kuat maa lagi pun ah ini ikan murah saja maa, paloi punya ikan tapi siuk main laa". Lapas atu kerapu tiger 6-7 kilo, "wo tiger laa ini bagus punya ikan, ini ikan manyak mahal wo ini macam punya ikan tida apa laa". Iski banar bisdia udah naik kerapu tiger atu eh, tarus Ah Meng ambil gambar uncle nya sama kerapu atu. Sekali lagi lauk durian-durian atau padas-padas dalam 2 kilo lah. "Ini kali ikan apa ah, tiger laa tiger bagus punya ikan laa" sekalinya naik "wo lulian laa lulian ini pun bagus maa"

Inda banyak lah lurih kami di Drop Off atu, pasalnya kami mendulur bisdia ani mengail ada jua lah sekali sekala kami ngail atu. Pisang Emas, kurisi india, rubi, amber jack, kerapu tiger, tengiri.

Pukul 3 ptg balik tah kami dari drop off singgah lagi di takat cantik inda ada makannya. Lapas atu singgah kami lagi di takat Maharaja ada 2 buah perahu menunda tungkul banyak jua lurihnya bisdia atu inda batah-batah nunda ada makannya. Di Maharaja ani aku ganya belurih menjig berah-berahan 7.4 kilo. Lapas atu baru tah kami balik, tengiri sama berah-berahan inda lagi tegambar.

Drop Off

Alwi

Amberjack mungkin ampir 30kg lah beratnya

perambut yang dipakainya 25Ibs ganya ni

Aji-aji sama kerapu

Sufri

Aji-aji sama kerapu

Amberjack

PEMBETULAN.

CP Awie sama Popperazi membagitau, lauk ani bukannya aji-aji atau king fish yang benarnya Amberjack antah apakan gelaran melayunya ah. Siapa yang tau atu bagitau ku ah ok terima kasih. 26.03.2010

Tempat mula-mula sekali kami singgahi iaitu di Takat Cantik kira-kira 15km dari Maharaja. Aku mencuba teknik jigging dulu sambil mencuba spool ku yang baru atu jua bah Daiwa Exceler 6000T ah apa kah rasanya. Baru 2 3 kali menjig kana sambar tia apa lagi 2 3 kali mempam kancangkan lagi dragnya lapas atu main tah, inda jua batah lah dalam 3 4 minit atu pun Captain lagi menyambung menaikkan. Udah di rumah menimbang 5.5kg beratnya.

Lepas rehat seketika sambung lagi menjig inda batah kana sambar lagi tapinya inda naik pasalnya ring yang ku pakai atu lepas dari kili-kili, lauk pun lepas jua lah tapi jig ada plang lakat eh pemata sama ringnya saja yang di bawanya kan dibuatkannya anting-anting bah. Lapas atu giliran Hj Win plang.

Aku makai

Spool Daiwa Exceler 6000T

Braided Spider wire 65Ibs

rod Lemax PE 6

Aji-aji atau king fish ani Hj Win belurih menjig jua ni di Takat Cantik. Dalam 13 minit lah memain baru tah dapat menaikkan ke perahu, atu pun minta jamin lagi arah Captain kami trip hari atu lah Awi bukan Capt. Precious eh. Dalam 8 minit Hj Win main ngalih tia, baru tah captain jua lagi menyambung sampai menaikkan ke perahu atu pun 2 orang bah menaikkan ah. Udah naik aji-aji ani inda lagi belauk bah di bawah ah, kami cuba lagi beberapa minit inda jua ada baru tah kami naik ke Drop Off.

Hj Win makai

Spool Shimano TwinPower 8000PG

Braided Xzoga 65Ibs

rod xzoga PE 6

Berat aji-aji ani alum kami tau sampai ani, kebanyakkan bisdia meneka beratnya melebihi 40kg. Kalau kami tau beratnya karang ada ku membagi tau tu ok,

Kalau biskita meneka berapa kg beratnya aji-aji ani.

Amberjack ani beratnya 35kg usulnya mcm labih bah .

AJI-AJI (KING FISH)

Ani gambar lama plang ni, nda tekanang kan mempos bah. Antadi pagi baru tah teliat gambar-gambar ani dalam external hd. Bila di mana bisdia ani belureh pun inda lagi ingat.

Sufri

Pa-iring sama Sufri

AJI-AJI (KINGFISH)

CP Awie sedang melapihi pemata dari mulut Aji-aji (kingfish).



Nah udah lapas pemata ah, apa lagi begambar lah. Bisdia ani mengail di Drop Off ni mun inda ku silap lah.


Ani udah di rumah ni, tempat ani macam studio ni asal balik dari laut saja di sini tah selalunya kami begambar ni, inda kira siang atau malam

king fish nya ani inda ku tau berapa kilo ah.


Ani Awi belurih aji-aji di drop off jua ni, tapi bukan hari sama tempat yang sama ni.


Tahniah CP Awie sama Awi