UNGAH

Precious Anglers turun hari sabtu 7/11/2009 di Pantai Serasa dari pukul 5.30 ptg lah kan mengail ungah di Ujung Sapuh. Bisdia ani kira bejarum-jarum lah sama ungah di sana ah hahaha untuk Ungah Grand Prix 14/11/2009.

Masa menurunkan perahu ani tepaksa seorang di perahu ni, takut melajak jauh tia anyutnya payah lagi menanangi mun kelurusan ada perahu lain bisai dapat jua menumpang kan mengaga. Pernah udah bah sekali masa turun di Muara inda tekanang kan naik seorang diperahu, cuba tia melajak ah nah tepaksa dinanangi ah dalam lagi tu hahaha yang menanangi atu senyum2 saja ah jan marah eh, inda apa jadikan pengajaran tu supaya beingat2 lain kali.

Ani masa menunggu C P Awie alum datang ia dari bandar, Padamit pun ada tu nah sama c cute Farahiyah (Dang Damit) nya ah, tapi Padamit inda ikut turun. Sambil2 menunggu atu geng2 diperahu mengusai2 kail tu bisdia ah, mun sampai di Ujung Sapuh karang tarus melabuh kail inda lagi payah kan mengusai-ngusai nya. Banar jua tu ah inda membuang masa kan. Ani digambar oleh Budamit.

Ni nah geng Precious semua udah ada yang kan turun hari atu lah, sebelum betolak begambar dulu nya Pa-iring. Dari yang seluar oren atu Dini, C P Awie, Duan, Jimi, Pa-iring, Awi sama Irman. 7 orang bisdia turun ari atu.

Ani tah saguhati yang bisdia balurih dari bejarum-jarum di Ujung Sapuh ah, 3 ekong ungah 1kg ke atas, 6 ekong ungah yang 1kg dan kebawah, 3 ekong kerapu yang 1kg ke atas, 6 ekong kerapu yang 1kg dan kebawah sama sekong bb ketambak. Bebaloi jua lah walaupun tekandung hujan labat angin kuat sama beombak. Syukur Alhamdulillah ada jua kan dibawa mulih. Tahniah geng Precious Anglers. Jangan lupa ah hari sabtu ani 14/11/2009 tani mengantat berian esuknya besanding tu ah.